Grotta da
cultura Sent

Grotta da
cultura Sent

La Grotta da cultura inrichischa la vita culturala da Sent cun rapreschantaziuns da teater, concerts, prelecziuns, discussiuns ed exposiziuns d’art daspö l’october dal 2006. Sper ils concerts in baselgia, organisats dal Ütil Public, pudaina spordscher üna bella schelta dad arrandschamaints d’ot nivo ad indigens ed a giasts. Per bleras artistas ed artists sun quai pussibitats fich bainvissas per as preschantar.

La Grotta da cultura es eir ün lö d’inscunter: Giodair ün’exposiziun cun ün magöl vin e cun üna baderlada, pudair sezzer insembel cullas artistas ed ils artists davo üna rapreschantaziun illa bar da la Grotta, quai sun occasiuns chi vegnan predschadas e trattas a nüz dal public.

La Grotta da cultura es üna part dal cumün. Ella collavurescha culla scoula e cun differentas societats organisond rapreschantaziuns per uffants ed arrandschamaints cun indigens. Las rapreschantaziuns pon esser in lingua rumantscha o tudais-cha o eir in üna misculanza, tuot tenor la tematica.

La Grotta da cultura es üna società chi vain sustgnüda dals commembers cun üna contribuziun annuala a partir da 25 francs. Üna gruppa da lavur es respunsabla pels arrandschamaints e pissera cha la bar e las exposiziuns sajan avertas regularmaing il mardi e la sonda da las 17.00 fin las 19.00.

Annunzchas per la commembranza vair suot società.

La Grotta da cultura survain sustegn dal cumün da Scuol. Quel sustegn cuverna circa il fit per la bar e la gallaria a Schigliana.
Our dal proget da transfuormaziun da la Confederaziun e'l Chantun (promouver daplü public davo la diminuziun pervi da corona) survain la Grotta da cultura pel 2022 e'l 2023 80% dals cuosts pel bus da cultura. Quist bus maina inavo gratuitamaing ils giasts a Scuol, Ftan, Ardez e Tarasp, davo mincha occurrenza da la saira.

Occurrenzas